Қоқиқаздар (лат. Phoenicopterus) — ұзын мойыны мен ұзын аяқтары бар, имек тұмсық және қызғылт қауырсынды, ерекше дене бітімді, сирек кездесетін құс. Олар су түбіндегі балдырлар мен ұсақ жәндіктерді тұмсығымен сүзу арқылы қоректенеді. Тұмсығының жиектері ұсақ ара тісшелеріндей тілімденген, сол арқылы су мен балшықты сыртқа шығарып, тек қорегін қалдырады. «Қарақия-Қаракөл» мемлекеттік табиғи (зоологиялық) қаумалы аумағындағы Қаракөл көлі қоқиқаздардың маусымдық миграция кезіндегі маңызды аялдау аймағы болып табылады. Жыл сайын мұнда мыңдаған қоқиқаздар топтанып келіп, көлді тынығу және энергия жинау орны ретінде пайдаланады.
